رســـــــــايل

1



احلى حاجة فى الدنيا انك تحب بجد
وعلى اد الحب ده توقع انك برضه هتتوجع بجد
الضربة الى بتجى من الحبايب بالذات بيبقى ليها الم من نوع خاص
تحس انك مش لاقى حتة تروح لها...ضايع ...تايه...خايف وقلقان
ساعتها مش بتلاقى غير دموع نازلة ونفسك تخبيها عشان ميشوفهاش وتحس بضعفك
ساعتها لما ياخدك فى حضنه ...بتبقى نفسك تعيط اوى ولانك بتحبه اوى بتبطل عياط
بس عياط قلبك بيبقى لسه شغال


2

قلبى لسه بيعيط من امبارح
برغم انى النهاردة بضحك وبتكلم معاك عادى
حاسسها؟؟
اكيد حسيتها ...بس مكنش فى رد فعل منك غير كلمة واحدة
خير ان شاء الله
فضحكت زيادة ...يا ترى معناها ان قلبى عيط اكتر
؟؟؟؟؟


3

بكره احس انى غلطانة وبالذات لو ع كلمة بسيطة
او بسيطة من وجهة نظرى
بس الى بكرهه اكتر انى اقول معلش ومتتقدرش صح
والى بيوجعنى اوى لما يكون مش مطلوب انى اقول معلش واقولها
نفسى اعرف اتعود اشوف الى احبهم بيزعلوا من غير ما احاول اصلح الموقف
عشان بس ميزعلوش
اصل انا شايلة همين ...هم زعلك وهم انى شايفاك كده
بس للاسف بيزيدوا هم تالت
انى بحس انى موجوعة اووووى لانى مش عارفة اقول معلش لنفسى اصلا


4

خايفة..محبطة ...قلقانة...معيطة
احاسيس لازم اتعايش معاها لوحدى
وبعيد عن اى حد
والمشكلة ان الناس بتصدق انك هتهدى لما تبقى لوحدك
بس اكتر حاجة مطمنانى انك موجود جوايا
حاسس بيا ...زعلان ليا...خايف عليا
حركتك جوايا حاساها طبطبة ..معناها انا جاى واهدى
بحبك اوى يا ابنى

5

عاوزة اقف مع نفسى فى حجات كتير
حجات لازم تكمل
وحجات لازم تبدأ

وعشان حجات تعيش حجات كتير لازم تموت


6

جبتلى اجندة حلوة اوى ومكنتش راضية اكتب فيها
عشان كنت مستينة لحظة عسولة تتكتب فى اولها
متوقعتش ان اول كلمة هتتكتب فيها
تكون زعل منك ومعاها دمعة نازلة منك انت
غلطانة انا اكيد انى كتبت فيها كده
بس كنت حاسة انى بشتكيلها منك

7

امى

مهما قولت مش هقدر اقولك غير انى ماليش غيرك بجد
وانتى سندى فى الدنيا دى كلها
بحبك اوى يا اغلى الناس


8

عاوزة اقولك ان مهما الى بعمله فيكى
متحملانى
ومقدرانى
وحاس بيا
اسفة لو بقسى عليكى
بس قدرك انك تكون صاحبتك مجنونة وبمية حالة

9

حاسة ان الدنيا فاضية اوى
وبرد اوى
بس فى حتة دفا اانا وانت بس الى عرفينها
حتة كلامنا وحودايتنا
اوضتك يا حبيبى انا

10

It's funny how the people that hurt you the
most, are the one's that promised they never
would.