قلـــــــــــــــــق

قبل ما حد يقرا البوست طويل ورغى اكتر منه ما فيه حاجة
ادينى قولت اهو
..

صاحية من النوم النهاردة وانا مقريفة جدا جدا
ومش عارفة ليه مع انى عاملة switch off
للبوصلة بتاعتى من فترة ومش بستجيب لاى حاجة بتطلبها ومش عارفة ليه جو -جلد الذات- ده الى انا بعمله

يمكن انا بينى وبين نفسى زعلانة اوووووووى منها ومش عاوزة ابين

لانى بجد مقصرة جامد معايا وده بيزيد احساسى بالذنب من نواحى كتير

اوحش حاجة لما تحس بالفقد والاوحش لما يكون انت بتفقد نفسك حبة حبة وتفضل تتحول لحد تانى خالص
فى زحمة انت ممكن تخلق لنفسك فيها استراحات صغيرة ليك بس مش بتتعمل مش عارفة ليه

كسل ولا ايه مش فاهمة

مش عارفة ليه افتكرت رواية دارية بتاعة سحر الموجى وفتحتها النهاردة
مع انى مخاصمة القراية من بدرى او بمعنى اصح بودى حرمنى اقرا لانى بشوف الكتاب كزا حتة قدامى
وهو بيضحك كأنه بيقولى انا موجود

الحياة الزوجية صعبة جداااااا
صعوبتها مش فى حاجة اد ما هى بيكون مطلوب جهد رهيييييييييب بجد عشان تفضل حلوة والعلاقة تبقى عسولة زى ما بقولها

طب انا حابة اعملها كده...والمفروض ادام بحب حاجة يبقى خلاص بقى ادوس فيها

نفسى ارجع تانى لنفسى بكل الحجات الى بحبها والى مش بحبها
بدل حالة الملل الفظيع الى انا فيها دى وانا عارفة حلها ومش قادرة حتى اعمله

كل ما بفتح اجنداتى القديمة واشوف كنت بكتب ايه بزعل اوى
بزعل ان زمان بكل حجم المشاكل الى كنت فيه كنت عارفة اتعامل
ودولوقتى بكل النعم الى ربنا ادهانى الحمد لله مش عارفة اتعامل

بقالى مليون سنة مأجلة كزا حاجة وبقول هعملها ومفيش اى حاجة

عاوزة اروح اشوف الكورس وانزله ....ولا الهوا
عاوزة اروح اجيب شهادتى وبرضو ولا الهوا
عاوزة انزل اشترى كتب من مدبولى الى بعشقها ولا الهوا
عاوزة اقعد معايا ع الاقل وبرضو ولا الهوا

ما هو اكيد العيب فيا بقى ...ما انا بعمل مليون حاجة لبودى وباباه
والبيت الى مش بيبطل طلبات من هنا وهناك

الدوامة بتلف ولا انا الى مفيش نفس ولا ايه مش عارفة

رمضـــــــــــان برضو مقصرة فى عباداتى مش ده الى انا عاوزاه
مش ده الى عاوزاه منى لما اطلع من رمضان واقول انا راضية عن نفسى

واخرتها ايه بقى ؟؟؟

يا رب انت الى عالم بيا
ادينى القدرة يا رب انى اكون زى ما تحب وترضى

مجهدة بطريقة غبية اوى وبقيت جامدة عن الاول كتير
مبقتش البنت الى كانت بتخاف لحد يزعل منها اوى حتى لو مغلطتش
دلوقتى لو مغلطتش خلاص بقيت بنام عادى حتى لو حد زعلان منى
مش عارفة ايه الى بيحصل ولا ايه الى جرالى ؟؟

وحشتنى البنت الطيبة
بكل متاعبها
يا رب ترجع بقى


بقيت شايفة نفسى من بعيد مركب ورق وانا واقفة بتفرج عليها من بره
:(